वीरगञ्ज । मङ्गलवार मध्य इजरायलको ब्नेई ब्राक सहरमा इरानी क्लस्टर बम विस्फोट हुँदा ९ जना घाइते भएका छन् । टाइम्स अफ इजरायलका अनुसार बम धेरै पटक ठोक्किएर विष्फोट भएको थियो ।

म्यागेन डेभिड एडोम (एमडीए) एम्बुलेन्स सेवाले जनाएअनुसार घाइतेमध्ये एक २३ वर्षीय पुरुषको अवस्था मध्यम छ भने बाँकी आठ जनाको अवस्था सामान्य छ । उनीहरूमध्ये छ जना बालबालिका र एक ८० वर्षीय महिला रहेका छन् । उनीहरू विस्फोट वा छर्राका कारण हल्का घाइते भएका हुन् ।

आक्रमण इजरायलले इरानको इस्फहान क्षेत्रमा रहेको प्रमुख विस्फोटक उत्पादन केन्द्रमा गरेको हवाई हमलापछि भएको हो । इरानले भने अमेरिका र इजरायलमाथि आफ्नो बुशेहर आणविक स्थलमा बम विस्फोट गराएको आरोप लगाएको छ ।

उद्धार सेवाका अनुसार पेटाह टिक्वा, गिभाट श्मुएल र रोश हायिनमा पनि बमका छर्रा खसेका थिए । ती स्थानमा भौतिक क्षति पुगे पनि मानवीय क्षति भएको छैन । घटना मङ्गलवार इजरायलमा प्रहार गरिएका १३ इरानी क्षेप्यास्त्रमध्ये १२औँ थियो । दिनभरका अन्य आक्रमणमा दुई शिशुसहित कम्तीमा ९ जना घाइते भएका थिए ।

बुधवार राति पनि इरानी क्षेप्यास्त्रका कारण दक्षिणी सहर इलात, जेरुसेलम र मध्य इजरायलका विभिन्न क्षेत्रमा साइरन बजाइएको थियो । एमडीएले आश्रयस्थलमा दौडँदा घाइते भएका वा तीव्र चिन्तामा परेका धेरै व्यक्तिको उपचार गरेको जनाएको छ ।

आक्रमणले इजरायल-इरान तनावलाई थप बढाएको छ र नागरिक क्षेत्रमा क्लस्टर बमको प्रयोगलाई लिएर चिन्ता व्यक्त गरिएको छ ।