वीरगञ्ज । पर्सा जिल्लाको जगरनाथपुर गाउँपालिका–३ जमुनियामा डिप बोरिङका लागि जडान गरिएको ट्रान्सफरमर चोरी भएको छ। अज्ञात समूहले ५० केभी क्षमताको उक्त ट्रान्सफरमर चोरेर लगेका हुन्।
यस घटनाले स्थानीय कृषकहरूमा ठूलो समस्या उत्पन्न भएको छ, किनभने ट्रान्सफरमर चोरीले २५ विघा क्षेत्रफलमा सिंचाइमा असर पर्ने जनाइएको छ।
गाउँपालिका अध्यक्ष श्रीकान्त प्रसाद यादवले ट्रान्सफरमर चोरीको पुष्टि गर्दै यसले गाउँको कृषि क्षेत्रमा गम्भीर प्रभाव पर्ने बताए। उनका अनुसार यस ट्रान्सफरमरले स्थानीय कृषकहरूको लागि डिप बोरिङ मार्फत पानी पुर्याउने व्यवस्था गरेको थियो। तर अहिले यो व्यवस्था प्रभावित हुँदा कृषकहरूलाई पानीको अभाव हुने सम्भावना देखिएको छ।
स्थानीय बासिन्दाहरूले प्रहरी चौकी पाण्डेपुरबाट ५ सय मिटरको दूरीमा ट्रान्सफरमर जडान गरिएको भए पनि राति गस्ती नहुँदा सार्वजनिक सम्पत्ति जस्तो ट्रान्सफरमर चोरी भएको बताएका छन्। स्थानीयहरूले यस घटनालाई गम्भीर रूपमा लिई भविष्यमा यस्ता चोरी रोकथामका लागि सुरक्षा व्यवस्था कडा पार्न आग्रह गरेका छन्।
चिरञ्जीवी यादव
