मुम्बई । बलिउड अभिनेता अक्षय कुमारको हालै रिलिज भएको फिल्म 'केसरी-२' विवादमा घेरिएको छ। फिल्मका संवादहरू चोरीको आरोप लगाइएको हो। यो आरोप एक युट्युबरले लगाएका हुन्। 

युट्युबर तथा कवि याह्या बुटवालाले फिल्मका लेखक र निर्माताहरूमाथि गम्भीर आरोप लगाउँदै फिल्ममा जलियाँवाला बागमा उनको कविता शब्दशः नक्कल गरिएको आरोप लगाएका छन् । उनलाई यसको श्रेय पनि नदिइएको उनको गुनासो छ।

सामाजिक सञ्जालमा आफ्नो कविताको भिडियोसँगै, युट्युबरले फिल्मको अनन्या पाण्डेको क्लिप पनि सेयर गरेका छन् जसमा उनको कविता प्रयोग गरिएको छ। फिल्मकी लेखिका सुमिता सक्सेनाले कपी-पेस्ट गरेको उनको दाबी छ । आफ्नो पोस्टमा याह्याले अक्षय कुमार, करण जोहर, अनन्या पाण्डे, सुमित सक्सेना र धर्मा प्रोडक्सनलाई ट्याग गरेका छन्।

युट्युबरले पोस्टको क्याप्सनमा लेखेका छन्, 'चार दिनअघि कसैले मसँग केसरी-२ को संवाद क्लिप साझा गरेका थिए, जुन उनलाई मेरो जालियाँवाला बाग कविताबाट प्रतिलिपि गरिएको जस्तो लाग्यो। जुन लगभग पाँच वर्ष अगाडि युट्युबमा पोस्ट गरिएको थियो। यहाँ दुई क्लिपहरू छन् र इमानदारीपूर्वक भन्नुपर्दा, यो सिधै कपी-पेस्ट हो। यो लुकाउन खोजेको जस्तो लाग्दैन। मानिसहरूको विचार मिल्न सक्छ तर एउटै विषयमा उस्तै लाइनहरू मिल्दैनन्।'

याह्याले अगाडि लेख्छन् - 'लेखकको रूपमा, कसैको सामग्रीलाई क्रेडिट नदिई लिनु गलत हो। अर्को पटक मलाई सम्पर्क गर्नुहोस्। म तपाईंको लागि मूल संवाद लेख्नेछु।'

यद्यपि, याह्याको भिडियो इन्स्टाग्रामले हटाएको छ। यसको जानकारी दिँदै उनले इन्स्टा स्टोरीमा दिए। 

उनी लेख्छन्- 'केसरी २ को संवादको बारेमा बनेको मेरो रिल इन्स्टाग्रामबाट हटाइएको छ। मैले त्यो रिल हटाएको छैन। तैपनि, यो समस्या समाधान नभएसम्म, म यस मुद्दाको बारेमा कुरा गरिरहनेछु र तपाईंहरू सबैले मलाई मद्दत गर्न र समर्थन गर्न अगाडि आउनुभएकोले तपाईंहरूलाई अद्यावधिक राख्नेछु। तपाईंहरूप्रति मेरो माया र कृतज्ञता बाहेक अरू केही छैन र आशा छ कि यो चाँडै समाधान हुनेछ।'

फिल्म 'केसरी-२' १८ अप्रिलमा रिलिज भएको थियो। केसरी -२ जलियाँवाला बाग नरसंहार पछिको कानुनी लडाइँमा आधारित अदालतको नाटक हो। यो वकिल शंकरन नायर र न्यायको लागि उनको लडाइँमा केन्द्रित छ।