नयाँदिल्ली । बलिउड अभिनेत्री दीपिका पादुकोण २०२४ को तेलुगु ब्लकबस्टर फिल्म ‘कल्की २८९८ एडी’ को सिक्वेलमा नदेखिने भएकी छिन् । नाग अश्विन निर्देशित फिल्म ‘कल्की २८९८ एडी’ निर्माण गर्ने वैजयन्ती मुभिजले सामाजिक सञ्जाल प्लेटफर्म एक्समा एउटा पोस्ट गर्दै यो खबर सेयर गरेको हो । 

दीपिका पादुकोण फिल्म कल्की २८९८ एडीको आगामी सिक्वेलको हिस्सा नहुने आधिकारिक रूपमा घोषणा गरिएको पोष्टमा लेखिएको छ । ‘धेरै विचार–विमर्श पछि, हामीले अलग हुने निर्णय गरेका छौँं। पहिलो फिल्मको लामो यात्राको बाबजुद, हामीले अर्को साझेदारी गर्न सकेनौँ । कल्की २८९८ एडी जस्तो फिल्मका लागि प्रतिबद्धता र योभन्दा बढी कुरा चाहिन्छ । हामी दीपिकालाई उनको भविष्यको प्रयासमा शुभकामना दिन्छौँ ।’ 

दीपिका पादुकोणले फिल्ममा ब्रह्माण्डको उद्धारकर्ता कल्कीकी आमा सुमतिको भूमिका निर्वाह गरेकी थिइन् । दीपिकाले फिल्ममा गर्भवती महिलाको भूमिका खेलेकी छिन् । कमल हासनले खेलेको खलपात्र यास्किन उनको ज्यान लिने प्रयास गरिरहेका हुन्छन् । फिल्मको क्लाइमेक्सको सुटिङ भइरहँदा दीपिका साँच्चै गर्भवती थिइन् । उनले २०२४ को सेप्टेम्बर ८ मा छोरी दुआलाई जन्म दिइन् । 

‘कल्की २८९८ एडी’मा प्रभास र अमिताभ बच्चनले दीपिका पादुकोणसँगै अभिनय गरेका थिए । फिल्ममा प्रभासले दोहोरो भूमिका निर्वाह गरेका थिए । नाग अश्विनद्वारा निर्देशित यो फिल्म महाभारतबाट प्रेरित छ ।

कथाको सेट महाभारत युद्ध भएको ६ हजार वर्षपछिको कुरुक्षेत्र छ । यहाँ २०० वर्ष उमेर भएका देवराजा सुिप्रम यास्किनले शासन गरिरहेका छन् । फिल्म दुई भागमा बनाउने भनिएको थियो । दीपिकाले दुवैमा काम गरिरहेकी थिइन् । तर अब अवस्था परिवर्तन भएको छ । 

किन बाहिरिइन् दीपिका ? 

फिल्मबाट दीपिका बाहिरिनुको कारण खुलाइएको छैन । यद्यपि, निर्माताहरूको ट्विटमा प्रतिबद्धताको उल्लेख गरिएको छ । दीपिकाको ८ घण्टाको सिफ्ट समस्या भएको हुन सक्ने अनुमान गरिएको छ ।

यसअघि दीपिकाले निर्देशक सन्दीप रेड्डी बाङ्गाको फिल्म स्पिरिट पनि छाडेकी थिइन् । उनले निर्माताहरू सामु दिनमा ८ घण्टाको सिफ्ट र ठुलो पारिश्रमिक सहित धेरै महत्त्वपूर्ण मागहरू गरेको खबर आएको थियो ।