बिहानको समयले मानिसको पूरा दिनको दिशा तय गर्छ। वास्तु शास्त्रका अनुसार मानिसको दिनचर्याको असर स्वास्थ्यमा मात्र नभई उसको भाग्य, करियर र आर्थिक स्थितिमा पनि प्रत्यक्ष पर्ने गर्छ।

धेरै पटक कडा मिहिनेत गर्दा पनि सोचेजस्तो सफलता नमिलिरहेको अवस्थामा बिहान उठ्ने बित्तिकै गरिने केही स-साना गलत बानीहरू कारक हुन सक्छन्, जसलाई मानिसले सामान्य ठानेर वास्ता गरिरहेका हुँदैनन्।

वास्तु शास्त्रका अनुसार निद्राबाट ब्युँझने बित्तिकै मनमा कस्तो विचार आउँछ, त्यसैले दिनभरको ऊर्जालाई प्रभावित गर्छ। धेरैजसो मानिस बिहान उठ्ने बित्तिकै मोबाइल चलाउने, अघिल्लो दिनको समस्या सम्झने वा पैसा र अधुरा कामको चिन्तामा डुब्ने गर्छन्। यस्तो नकारात्मक सोचले मानसिक तनाव बढाउनुका साथै सकारात्मक ऊर्जालाई कमजोर बनाउँछ, जसले अन्ततः प्रगतिको बाटोमा अवरोध सिर्जना गर्छ।

ओछ्यान छोड्ने समयमा गरिने हतारोलाई पनि वास्तुले अशुभ मानेको छ। निद्रा खुलेपछि सिधै भुइँमा खुट्टा राख्नुभन्दा केही बेर शान्त भएर बस्नु राम्रो मानिन्छ। हतारमा उठ्ने वा झर्को मान्दै दिनको सुरुवात गर्दा मन अस्थिर हुने र दिनभरका काममा बाधा पुग्ने सम्भावना रहन्छ।

त्यस्तै, आजको डिजिटल युगमा आँखा खुल्ने बित्तिकै मोबाइल हेर्ने बानीले झन् ठूलो नोक्सानी पुऱ्याइरहेको छ। मोबाइलमा आउने नकारात्मक समाचार वा तनावपूर्ण जानकारीले एकाग्रता र कार्यक्षमतामा ह्रास ल्याउँछ।

जीवनमा सकारात्मक परिवर्तन ल्याउन बिहान उठ्ने बित्तिकै सबैभन्दा पहिले इष्टदेवको स्मरण गर्ने वा मनमा सकारात्मक विचार ल्याउने बानी बसाल्नुपर्छ। त्यसपछि घरका झ्याल-ढोका खोलेर ताजा हावा र उज्यालो भित्र पस्न दिनु वास्तुका दृष्टिले निकै लाभदायक हुन्छ। यसले घरमा सकारात्मक ऊर्जाको सञ्चार गराउनुका साथै मनलाई शान्त राख्छ।