वीरगञ्ज । जीएचपी स्कुलले शैक्षिक सत्र २०८३ का लागि भव्य इन्भेस्टिचर (लगानी) समारोह आयोजना गर्दै नवनिर्वाचित विद्यार्थी परिषद्का पदाधिकारीहरूलाई औपचारिक रूपमा शपथ ग्रहण गराएको छ।
विद्यालयमा आयोजित समारोहमा अनुशासन, नेतृत्व क्षमता, जिम्मेवारीबोध र विद्यालयप्रतिको समर्पणको भाव झल्किएको थियो। कार्यक्रममा विद्यार्थी नेताहरूले आफ्नो जिम्मेवारी इमानदारीपूर्वक निर्वाह गर्दै विद्यालयको प्रतिष्ठा र मूल्य–मान्यतालाई उच्च राख्ने प्रतिबद्धता व्यक्त गरेका थिए।
समारोहका प्रमुख अतिथि मेजर उमेश बस्नेतले अनुशासन, इमानदारी र निःस्वार्थ सेवाभाव नै सफल नेतृत्वको आधार भएको उल्लेख गर्दै विद्यार्थीहरूलाई जिम्मेवार, अनुशासित र राष्ट्रप्रति समर्पित नागरिक बन्न प्रेरित गरेका थिए।
त्यसैगरी, विशिष्ट अतिथि स्थानीय वडा सहायक प्रहरी निरीक्षक (एएसआई) बिशेश्वर यादवले नागरिक दायित्व, सामुदायिक सुरक्षा र नेतृत्वको महत्त्वबारे आफ्ना अनुभव साझा गर्दै विद्यार्थीहरूलाई समाजप्रति उत्तरदायी भूमिका निर्वाह गर्न आग्रह गरेका थिए।
समारोहका क्रममा विद्यालयका नवनियुक्त हेड ब्वाय, हेड गर्ल, हाउस क्याप्टेन तथा प्रिफेक्टहरूलाई औपचारिक रूपमा ब्याज र स्यास प्रदान गरिएको थियो। त्यसपछि उनीहरूले विद्यालयको मर्यादा, अनुशासन र आदर्शलाई कायम राख्ने तथा आफ्नो जिम्मेवारी निष्ठापूर्वक पूरा गर्ने शपथ लिएका थिए।
विद्यालय प्रशासनले नवनियुक्त विद्यार्थी नेतृत्वलाई बधाई दिँदै उनीहरूले आफ्ना सहपाठीका लागि अनुकरणीय नेतृत्व प्रस्तुत गर्दै विद्यालयलाई अझ नयाँ उचाइमा पुर्याउने विश्वास व्यक्त गरेको छ।
यात्रा डेली
