सामान्यतया २४ वर्षको उमेरमा आम युवाहरूले आफ्नो पढाइ पूरा गर्ने वा करिअरको सुरुवातबारे सोचिरहेका हुन्छन् । तर अलेक्जेन्डर वाङले भने यही उमेरमा इतिहास रचेका थिए ।

सन् २०२१ मा उनी विश्वकै सबैभन्दा कम उमेरका ‘सेल्फ–मेड’ अर्बपति बने । ‘सेल्फ–मेड’ भन्नाले उनले यो सम्पत्ति कुनै विरासतबाट होइन, आफ्नै क्षमता र मेहनतबाट कमाएका हुन् ।

फोर्ब्सको पछिल्लो तथ्यांकअनुसार वाङको कुल सम्पत्ति करिब ३ अर्ब २ करोड अमेरिकी डलर पुगेको छ ।

अमेरिकाको न्यू मेक्सिकोका बासिन्दा अलेक्जेन्डर वाङको दिमाग सानैदेखि कम्प्युटर र कोडिङको मामिलामा तीक्ष्ण थियो। जसका कारण १७ वर्षको उमेरमै उनले ‘एडडेपार’ र ‘क्वोरा’ जस्ता सिलिकन भ्यालीका ठूला कम्पनीमा फुल–टाइम जागिर पाए । त्यसपछि उनी मेसिन लर्निङ अध्ययनका लागि विश्वप्रसिद्ध म्यासाचुसेट्स इन्स्टिच्यूट अफ टेक्नोलोजीमा भर्ना भए । तर उनको लक्ष्य निकै ठूलो थियो । उनले १९ वर्षकै उमेरमा स्केल एआई नामक आफ्नै कम्पनी सुरु गरे र त्यसका लागि एमआटीको पढाइ नै छोडे ।

वाङले १९ वर्षको उमेरमा स्थापना गरेको स्केल एआई कम्पनीले एआई मोडेललाई तालिम दिन डेटा लेबलिङ तथा लार्ज ल्याङ्ग्वेज मोडेलहरूको मूल्यांकनजस्ता सेवाहरू प्रदान गर्छ । सन् २०२५ को जुनसम्म उनी उक्त कम्पनीको सिईओ रहे।

मेटाले निकै महंगो मूल्यमा सम्झौता गर्दै स्केल एआई कम्पनीको ४९ प्रतिशत हिस्सेदारी खरिद गरेसँगै वाङ कम्पनीको सिइओ पदबाट अलग भए र स्वयम् मेटा कम्पनीको प्रमुख एआई अधिकृतको जिम्मेवारी सम्हाल्न पुगे ।

हाल उनले फेसबुकका संस्थापक तथा मेटाका सिइओ मार्क जुकरबर्गको मेटा सुपर इन्टेलिजेन्स ल्याब्सको नेतृत्व गरिरहेका छन् । वाङको दक्षता र क्षमताका कारणले गर्दा नै जुकरबर्गले उनलाई यो महत्वपूर्ण जिम्मेवारी दिएका हुन् । कम उमेरमै ठूलो उपलब्धि हासिल गरेका एलेक्जेंडर वाङ आज विश्वभरका युवाहरूका लागि प्रेरणाको स्रोत बनेका छन् ।