वीरगञ्ज । नेपालमा स्मार्टफोनको आयातमा वृद्धि भएको छ । चालु आर्थिक वर्ष २०८२/८३ को पहिलो ९ महिनामा नेपालमा साढे ३३ अर्ब रुपैयाँभन्दा बढीको स्मार्टफोन भित्रिएको छ ।

भन्सार विभागको तथ्याङ्क अनुसार, साउनदेखि चैत मसान्तसम्मको अवधिमा कूल ३३ अर्ब ८२ करोड २५ लाख रुपैयाँ बराबरको स्मार्टफोन आयात भएको हो । यस अवधिमा १६ लाख ७४ हजार थान स्मार्टफोन नेपाल भित्रिएका छन् ।

गत आवको सोही अवधिको तुलनामा यस वर्ष स्मार्टफोन आयातको ग्राफ निकै माथि देखिएको छ । विभागका अनुसार गत वर्ष चैत मसान्तसम्म २५ अर्ब ३८ करोड ४४ लाख रुपैयाँ बराबरको स्मार्टफोन आयात भएको थियो ।

उक्त समयमा १५ लाख ८४ हजार थान स्मार्टफोन नेपाल भित्रिएका थिए । गत वर्षको तुलनामा यस वर्ष स्मार्टफोन आयातको सङ्ख्यामा करिब ९० हजार थानले वृद्धि भएको छ भने मूल्यका आधारमा झन्डै साढे ८ अर्ब रुपैयाँले वृद्धि भएको देखिन्छ ।

तथ्याङ्कलाई हेर्दा नेपाली बजारमा महँगा र आधुनिक स्मार्टफोनको माग बढ्दै गएको देखिन्छ । सरकारले विलासिताका वस्तुको आयातमा लगाएको प्रतिबन्ध हटेसँगै र बजारमा नयाँ मोडलका फोनहरूको उपलब्धता बढेसँगै स्मार्टफोन आयातको तथ्याङ्क उकालो लागेको हो ।