वीरगञ्ज । वीरगञ्जस्थित नेपाल डिजिटल एजुकेसन (एनडीई) ले आधुनिक शिक्षा, डिजिटल साक्षरता तथा २१औँ शताब्दीका सीप विकासमार्फत विद्यार्थीहरूलाई भविष्यका अवसरका लागि सक्षम बनाउने उद्देश्यसहित उल्लेखनीय गतिविधिहरू सञ्चालन गर्दै आएको छ । वि.सं. २०७९ मा स्थापना भएको यस संस्थाले छोटो समयमै शिक्षा तथा सीप विकासको क्षेत्रमा आफूलाई एक अग्रणी संस्थाका रूपमा स्थापित गर्न सफल भएको जनाएको छ ।
संस्थाका संस्थापक राकेश कुमार साहसँग १० वर्षभन्दा बढी शिक्षण अनुभव रहेको छ । उनले ज्ञानदा एकेडेमी, ज्ञान ज्योति तथा ज्ञान निकेतन लगायतका विभिन्न शैक्षिक संस्थाहरूमा अध्यापन गरिरहेका छन् । साथै, वीरगञ्जका विभिन्न प्रतिष्ठित विद्यालयका विद्यार्थीहरूलाई कोचिङ तथा प्रशिक्षणमार्फत मार्गदर्शन गर्दै आएको अनुभव पनि उनीसँग छ । विभिन्न प्रशिक्षण कार्यक्रमहरूमा प्रशिक्षक (ट्रेनर) का रूपमा सक्रिय रहँदै उनले विद्यालय तथा संस्थाहरूमा सीप विकाससम्बन्धी महत्त्वपूर्ण योगदान पुर्याउँदै आएका छन् ।
यस वर्ष २०८३ मा एनडीईले विभिन्न उल्लेखनीय उपलब्धिहरू हासिल गरेको उनले जनाएका छन् । साहका अनुसार, सूचना तथा सञ्चार प्रविधि दिवस (आईसीटी डे) को अवसरमा कम्प्युटर एसोसिएसन नेपाल (क्यान पर्सा) सँगको सहकार्यमा साइबर सुरक्षा तालिम सञ्चालन गरिएको थियो । उक्त कार्यक्रम पाँचभन्दा बढी राष्ट्रिय तथा स्थानीय सञ्चार माध्यमहरूमा प्रकाशित तथा विशेष सामग्री (फिचर) का रूपमा समावेश भएको संस्थाले जनाएको छ । साथै, संस्थाले पेसागत तथा समुदाय-आधारित सीप विकासका कार्यक्रमहरूलाई थप विस्तार गर्दै विभिन्न क्षेत्रका युवाहरूलाई प्रशिक्षण प्रदान गरिरहेको छ ।
नेपाल डिजिटल एजुकेसनले आधारभूतदेखि उन्नत स्तरसम्मका विविध प्रशिक्षण कार्यक्रम सञ्चालन गर्दै आएको छ । संस्थाले कम्प्युटर तालिम, सूचना प्रविधि तथा डिजिटल सीप, सार्वजनिक बोलाइ (पब्लिक स्पिकिङ) तथा व्यक्तित्व विकास, डिजिटल पहिचान तथा व्यक्तिगत ब्रान्ड निर्माण, ग्राफिक डिजाइन, भिडियो सम्पादन तथा सामग्री निर्माण, अन्तर्वार्ता तयारी, करिअर परामर्श, उद्यमशीलता सचेतना लगायतका कार्यक्रम सञ्चालन गरिरहेको छ । यसबाहेक सामाजिक तथा डिजिटल साक्षरता कार्यक्रममार्फत विद्यार्थी तथा युवाहरूमा व्यवहारिक ज्ञान अभिवृद्धि गर्ने प्रयाससमेत भइरहेको बताइएको छ ।
यसै वर्ष संस्थाले “एनडीई उद्यमशीलता क्लब” स्थापना गरेको छ । उक्त क्लबमार्फत विद्यार्थीहरूमा उद्यमशील सोच, नेतृत्व क्षमता, नयाँ व्यवसाय (स्टार्टअप) सम्बन्धी अवधारणा तथा समस्या समाधान गर्ने सीप विकासमा सहयोग पुग्ने विश्वास गरिएको छ । त्यस्तै, “एनडीई लोकसेवा फाउन्डेसन” को स्थापना गर्दै कक्षा ६ देखि माथिका विद्यार्थीहरूलाई लोकसेवा तयारीको प्रारम्भिक आधार निर्माण गर्ने अवसर प्रदान गरिएको संस्थाले जनाएको छ । यस कार्यक्रमअन्तर्गत सामान्य ज्ञान, विश्लेषणात्मक सोच तथा प्रतिस्पर्धात्मक परीक्षाका लागि आवश्यक आधारभूत क्षमता विकास गराइनेछ ।
शैक्षिक उपलब्धितर्फ पनि एनडीईका विद्यार्थीहरूले उत्कृष्ट नतिजा हासिल गरेका छन् । विद्यार्थी समीर कुमार कर्णले ४.० जिपिए प्राप्त गर्दै प्लस टु विज्ञान सङ्काय अध्ययनका लागि शतप्रतिशत छात्रवृत्ति प्राप्त गर्ने सम्भावना बनाएका छन् ।
त्यसैगरी, विगत केही वर्षमा संस्थाका विद्यार्थीहरूले विभिन्न छात्रवृत्ति तथा प्रतियोगितात्मक क्षेत्रमा सफलता हासिल गरेका छन् । वि.सं. २०८१ मा गौरव कर्ण वीरगञ्ज महानगरपालिका छात्रवृत्ति अन्तर्गत एनआई कलेजमा नाम निकाल्न सफल भएका थिए । वि.सं. २०८२ मा प्रकाश राउत बालेन छात्रवृत्ति अन्तर्गत ट्रिनिटी कलेजमा भर्ना भएका थिए भने मान्सी सिंह ह्वाइट हाउस इन्टरनेशनल कलेजमा चयन भएकी थिइन् । ध्रुव साह अर्बन स्कुल अफ साइन्समा प्रवेश गर्न सफल भएका थिए भने सुनिश्चय तिवारी हेटौँडा स्कुल अफ म्यानेजमेन्टमा भर्ना भएका थिए ।
प्रतियोगितात्मक क्षेत्रमा पनि विद्यार्थीहरूले उल्लेखनीय उपलब्धि हासिल गरेका छन् । प्रकाश राउतले रौतहटको परोहा नगरपालिकाद्वारा आयोजित युट्युब भिडियो प्रतियोगितामा दोस्रो स्थान हासिल गरेका थिए भने मान्सी सिंहले प्रथम स्थान प्राप्त गरेकी थिइन् । अर्पिता शाहले एएचएफ नेपाल भिडियो प्रतियोगितामा प्रथम स्थान हासिल गर्दै नगद पुरस्कार जितेकी थिइन् । त्यस्तै, प्रार्थना अधिकारीले बीएएस नेपाल सार्वजनिक बोलाइ प्रतियोगितामा चौथो स्थान हासिल गर्दै प्रमाणपत्र, मेडल तथा नगद पुरस्कार प्राप्त गरेकी थिइन् । अधिकारी वीरगञ्जस्थित डल्फिन कन्सल्टेन्सीद्वारा व्यावसायिक भिडियो निर्माता (प्रोफेसनल भिडियो क्रियटर) का रूपमा चयन भएको संस्थाले जनाएको छ ।
संस्थाले विद्यार्थीहरूलाई चरणबद्ध रूपमा २१औँ शताब्दीका आवश्यक सीप सिकाउने उद्देश्यले विशेष “सीप विकास मार्गचित्र (रोडम्याप)” समेत तयार गरेको छ । उक्त मार्गचित्रमा आत्म अन्वेषण, सञ्चार सीप, डिजिटल पहिचान, सिर्जनशीलता, नेतृत्व तथा करिअर तयारी लगायतका विषय समेटिएका छन् ।
नेपाल डिजिटल एजुकेसनले भविष्यमा नेपालभर डिजिटल साक्षरता, सीप-आधारित शिक्षा तथा आधुनिक सिकाइ संस्कृतिको विकास गर्ने लक्ष्य लिएको जनाएको छ । व्यवहारिक शिक्षामार्फत नयाँ पुस्तालाई आत्मविश्वासी, सृजनशील तथा भविष्यका चुनौती सामना गर्न सक्षम बनाउने संस्थाको दीर्घकालीन उद्देश्य रहेको संस्थापक राकेश कुमार साहले बताएका छन् ।
यात्रा डेली
