एआइको सहयोगबाट तयार पारिएको सांकेतिक तस्बिर ।
वीरगञ्ज । पर्साको धोबिनी गाउँपालिका–४ लङ्गडीमा करोडौं रुपैयाँको लागतमा निर्माण गरिएको आधुनिक स्वास्थ्य चौकी सञ्चालनमा आए पनि त्यहाँसम्म पुग्ने पहुँच मार्गको अभावले स्थानीय बासिन्दाले वर्षौंदेखि सास्ती खेप्दै आएका छन्। विशेषगरी वर्षायाममा सडक हिलाम्मे र जलमग्न हुने भएकाले बिरामी, गर्भवती महिला तथा ज्येष्ठ नागरिकलाई स्वास्थ्य चौकीसम्म पुर्याउन निकै कठिन हुने गरेको स्थानीयवासीको गुनासो छ।
स्थानीय प्रदीप पटेलका अनुसार स्वास्थ्य चौकी निर्माणपछि गाउँमै सहज स्वास्थ्य सेवा उपलब्ध हुने अपेक्षा गरिए पनि स्वास्थ्य चौकी जोड्ने मुख्य सडक वर्षा सुरु भएसँगै हिलोले भरिने र सवारीसाधन सञ्चालन गर्नै कठिन हुने भएकाले सेवा प्रभावकारी रूपमा उपयोग हुन सकेको छैन।
एम्बुलेन्ससमेत गाउँभित्र सहज रूपमा प्रवेश गर्न नसक्दा बिरामीलाई बोकेर मुख्य सडकसम्म ल्याउनुपर्ने बाध्यता रहेको स्थानीयहरू बताउँछन्। त्यसपछि मात्र पोखरिया वा वीरगञ्जस्थित अस्पतालमा रेफर गर्नुपर्ने अवस्था रहेको उनीहरूको भनाइ छ।
हरेक वर्ष वर्षायाममा सडकमा बाक्लो हिलो जम्ने, पानी निकासको उचित व्यवस्था नहुँदा सवारीसाधन फस्ने र आवतजावत नै प्रभावित हुने समस्या दोहोरिने गरेको स्थानीयहरूको गुनासो छ। यसले स्वास्थ्य सेवा मात्रै होइन, विद्यालय जाने विद्यार्थी, किसान तथा सर्वसाधारणको दैनिक जनजीवनसमेत प्रभावित हुँदै आएको उनीहरूको भनाइ छ।
स्थानीयवासीका अनुसार करोडौं रुपैयाँ खर्चेर आधुनिक स्वास्थ्य चौकी निर्माण गरिए पनि त्यससम्म पुग्ने सडकको स्तरोन्नति नगरिँदा स्वास्थ्य चौकीको उद्देश्य नै ओझेलमा परेको छ।
“स्वास्थ्य चौकी त बन्यो, तर त्यहाँ पुग्ने बाटो नै छैन। सडक राम्रो नहुँदा गाउँकै स्वास्थ्य चौकीभन्दा बाहिरको अस्पताल धाउनुपर्ने अवस्था विडम्बनापूर्ण छ,” एक स्थानीयले दुखेसो पोखे।
स्थानीयहरूले गाउँपालिका, प्रदेश सरकार तथा सम्बन्धित निकायसँग स्वास्थ्य चौकीसम्म पुग्ने सडक तत्काल निर्माण तथा स्तरोन्नति गर्न माग गरेका छन्। कम्तीमा ग्राभेल वा कालोपत्रे सडक निर्माण गरी वर्षैभरि सहज आवतजावतको व्यवस्था मिलाउनुपर्ने उनीहरूको जोड छ।
स्थानीयको भनाइमा करोडौं रुपैयाँ खर्चेर आधुनिक स्वास्थ्य चौकी निर्माण गर्नु मात्र पर्याप्त नहुने, त्यससम्म सुरक्षित र सहज पहुँच सुनिश्चित गरिएपछि मात्रै नागरिकले गुणस्तरीय स्वास्थ्य सेवाको वास्तविक लाभ लिन सक्नेछन्। त्यसैले लङ्गडीस्थित स्वास्थ्य चौकीलाई साँच्चिकै नमूना स्वास्थ्य संस्था बनाउन पहुँच मार्गको तत्काल निर्माण अपरिहार्य रहेको स्थानीयहरूको माग छ।
यात्रा डेली
