वीरगञ्ज । पर्सा निर्वाचन क्षेत्र नम्बर ३ मा हालै सम्पन्न प्रतिनिधिसभा सदस्य निर्वाचनको परिणामपछि नेकपा (एमाले) ले मतदाताहरूसँग सिधा भेटघाट गरी धन्यवाद ज्ञापन गरेको छ ।
पार्टीका युवा उम्मेदवार रुपेश कुमार पाण्डेयले विभिन्न स्थानहरूमा पुगेर मतदाता, शुभचिन्तक र कार्यकर्ताहरूसँग भेटेर कृतज्ञता व्यक्त गरेका छन् ।
फागुन २१ गते भएको निर्वाचनको नतिजापछि पाण्डेयले जनताको फैसलालाई सम्मान गर्दै लोकतान्त्रिक संवादलाई पुनः सक्रिय बनाएका हुन् । यस क्रममा उनले निर्वाचनमा दिएको साथ, सहयोग र मतप्रति सबैलाई हार्दिक धन्यवाद दिएका छन् ।
पाण्डेयले निर्वाचनलाई हार–जितको सामान्य प्रतिस्पर्धा ठानेर समाजसेवाको बाटोमा कुनै रोकावट नहुने बताए । “यो लोकतन्त्रको एक हिस्सा हो, जसमा विजय र पराजय स्वाभाविक हुन्छ। तर जनसेवा र परिवर्तनको लक्ष्य बोकेकाहरू कहिल्यै थाक्दैनन्,” उनले भने ।
उनले नतिजालाई सकारात्मक रूपमा लिँदै जनतामाझ रहँदै विकास, सुशासन र सामाजिक न्यायका लागि निरन्तर क्रियाशील रहने वाचा गरे । निर्वाचनमा पाएको जनसमर्थनले आफूलाई थप प्रेरित र जिम्मेवार बनाएको उनको भनाइ छ ।
एमालेका स्थानीय नेताहरूका अनुसार, निर्वाचन परिणाम जस्तोसुकै भए पनि क्षेत्रमा पार्टीको आधार मजबुत रहेको र युवा नेतृत्वप्रति जनआकर्षण बढिरहेको छ । रुपेश पाण्डेयको संवाद अभियानले सङ्गठनलाई अझ बलियो बनाउने उनीहरूको विश्वास छ ।
पार्टीले कार्यक्रमलाई जनसम्बन्ध सुदृढ गर्ने अवसरका रूपमा लिएको छ । पाण्डेयले आगामी दिनमा जनताका गुनासा, सल्लाह र आशालाई सुनेर सङ्गठन मजबुत पार्दै सेवा जारी राख्ने प्रतिबद्धता जाहेर गरेका छन् ।
निर्वाचनमा पराजित भए पनि पाण्डेयको सक्रियता पर्सा–३ मा उदीयमान युवा नेतृत्वको प्रतीक मानिएको छ । यसले उनको राजनीतिक भविष्यलाई थप उज्ज्वल बनाउने अपेक्षा छ ।
कार्यक्रममा नेकपा (एमाले) का केन्द्रीय सदस्य तथा पर्सा इन्चार्ज प्रभु हजरा, क्षेत्रीय परिचालन कमिटी संयोजक प्रमोद जयसवालसहित स्थानीय नेता–कार्यकर्ताहरूको सक्रिय उपस्थिति थियो ।
यात्रा डेली
