फाइल तस्बिर ।
वीरगञ्ज । फागुन २१ गते पर्सा जिल्लामा शान्तिपूर्ण र निष्पक्ष रूपमा सम्पन्न प्रतिनिधिसभा सदस्य निर्वाचन सफलतापूर्वक सम्पन्न गर्न योगदान पुर्याउने सबैलाई जिल्ला प्रशासन कार्यालयले धन्यवाद ज्ञापन गरेको छ ।
जिल्ला प्रशासन कार्यालय पर्साका निमित्त प्रमुख जिल्ला अधिकारी विनोद कुमार पोखरेलले जारी गरेको धन्यवाद ज्ञापन पत्रमा निर्वाचन प्रक्रियालाई सफल बनाउन महत्त्वपूर्ण भूमिका निर्वाह गर्ने सम्पूर्ण सरोकारवालाहरूप्रति कृतज्ञता व्यक्त गरिएको छ ।
पत्रमा जिल्लास्थित सुरक्षा निकाय, सुरक्षाकर्मी, निर्वाचन कर्मचारी, राजनीतिक दल तथा उम्मेदवारहरू, सञ्चारकर्मी, विभिन्न पेसामा आबद्ध पेसाकर्मी, सङ्घसंस्थाका प्रमुख तथा प्रतिनिधि, उद्योगी तथा यातायात व्यवसायी, पर्यवेक्षक तथा अनुगमनकर्ता, नागरिक समाज तथा सामाजिक अगुवा लगायत सम्पूर्ण पर्सा जिल्लावासी तथा सीमावर्ती क्षेत्रका समकक्षी पदाधिकारीहरूलाई विशेष धन्यवाद दिइएको छ ।
“निर्वाचनलाई शान्तिपूर्ण र निष्पक्ष तवरले सम्पन्न गराउन सबैको योगदान अमूल्य छ,” पोखरेलले पत्रमा उल्लेख गर्दै जिल्ला सुरक्षा समितिको निर्णयअनुसार यो धन्यवाद ज्ञापन गरिएको बताएका छन् । निर्वाचनले जिल्लामा लोकतान्त्रिक प्रक्रियालाई मजबुत बनाएको र सबैको सहकार्यले नै यसलाई सफल बनाएको उनको भनाइ छ ।
पर्सा नेपालको तराई क्षेत्रमा अवस्थित छ र भारतसँग सीमा जोडिएको छ । निर्वाचनका क्रममा कुनै पनि अप्रिय घटना नघटेकोमा स्थानीयहरूले समेत खुसी व्यक्त गरेका छन् । निर्वाचन आयोगका अनुसार, निर्वाचनमा उच्च मतदाता सहभागिता देखिएको थियो ।
जिल्ला प्रशासनले आगामी दिनहरूमा पनि यस्तै सहकार्य कायम राख्न सबैलाई आह्वान गरेको छ ।
यात्रा डेली
