वीरगञ्ज । उत्तर कोरियाका सर्वोच्च नेता किम जोंग उनले देशमा चुनाव गराएका छन् । सरकारी समाचार एजेन्सी केसीएनएका अनुसार सर्वोच्च नेता किम जोंग उन र उनको वर्कर्स पार्टी अफ कोरियाले लगभग सबै मत र सबै सिट जित्दै भारी बहुमतसहित विजय हासिल गरेका छन् ।

मार्च १५ मा सम्पन्न यस चुनावमार्फत १५औँ सर्वोच्च जनसभाका सदस्यहरू चयन गरिएको हो । मतदान प्रतिशत लगभग शतप्रतिशत रहेको बताइएको छ ।

उत्तर कोरियामा वास्तविक बहुदलीय लोकतन्त्र नभएकाले किम जोंग उनकै जित निश्चित नै मानिन्छ । तर, यस पटक ध्यान तान्ने विषय भनेको उनको पार्टी र सहयोगी दलहरूले ९९.९३ प्रतिशत मत प्राप्त गर्नु हो ।

यसको अर्थ ०.०७ प्रतिशत मतदाताले उम्मेदवारको विरोधमा मत दिएका छन् । यस विषयले अहिले सामाजिक सञ्जालमा व्यापक चर्चा पाएको छ ।

सरकारी तथ्याङ्कअनुसार ९९.९९ प्रतिशत मतदाताले मतदान गरेका थिए भने ०.००३७ प्रतिशत विदेशमा वा समुद्रमा कामका कारण मतदान गर्न सकेनन्, ०.००००३ प्रतिशतले मतदान नै गरेनन् । मतदान गर्नेमध्ये ९९.९३ प्रतिशतले समर्थन गरे भने ०.०७ प्रतिशतले विरोध जनाए । 

विशेषज्ञहरूका अनुसार सन् १९५७ पछि पहिलो पटक राज्य सञ्चारमाध्यमले केही मत उम्मेदवारको विरोधमा पनि परेको स्वीकार गरेको हो । यद्यपि यो प्रतिशत निकै कम भए पनि उत्तर कोरिया जस्तो देशमा यसलाई असामान्य रूपमा महत्त्वपूर्ण मानिएको छ ।

यस चुनावमा कुल ६८७ जना प्रतिनिधि चयन भएका छन् । निर्वाचित हुनेहरूमा कामदार, किसान, बुद्धिजीवी, सेवा क्षेत्रका कर्मचारी तथा सरकारी अधिकारीहरू समावेश छन् । तर प्रत्येक निर्वाचन क्षेत्रमा एक मात्र उम्मेदवार हुने भएकाले आलोचकहरूले यसलाई औपचारिक वा देखावटी चुनावका रूपमा व्याख्या गर्छन् ।

आगामी सत्रमा देशको नयाँ नेतृत्व चयन हुनेछ । संविधानमा सम्भावित ठुला परिवर्तनबारे छलफल हुनेछ । किम जोंग उनलाई पुनः सर्वोच्च नेता र स्टेट अफेयर्स कमिसनका अध्यक्ष बनाइने सम्भावना छ ।

दक्षिण कोरियाप्रति कडा नीति संविधानमै समावेश गर्ने विषयमा निर्णय हुन सक्छ । यद्यपि संसद्लाई प्रायः पार्टीका निर्णयलाई औपचारिकता दिने संस्थाका रूपमा लिइन्छ, कानुनी रूपमा भने यसको महत्त्व उच्च छ ।

यस पटक सांसद सूचीमा पनि ठुलो फेरबदल गरिएको छ । ७० प्रतिशतभन्दा बढी सांसद परिवर्तन गरिएको छ । किमका निकट सहयोगी जो योंग-वोन स्थायी समितिको अध्यक्ष बन्न सक्ने सम्भावना छ ।

पूर्व अध्यक्ष चोए र्योंग-हे सूचीमा नरहेको र किमकी बहिनी किम यो-जोंग र विदेश मन्त्री चोए सों-हुई नयाँ संसद्मा समावेश हुने सम्भावना छ । 

राज्य सञ्चारमाध्यमका अनुसार प्रतिनिधिहरू कामदार, किसान र सरकारी अधिकारीहरूबाट चयन गरिएका हुन् र उनीहरूले पार्टीको नीतिलाई अघि बढाउनेछन् ।

यद्यपि ०.०७ प्रतिशत विरोधी मत देखिए पनि धेरै विश्लेषकहरूले यसलाई प्रचारात्मक प्रयासका रूपमा हेर्छन्, किनभने उत्तर कोरियामा चुनाव पूर्ण रूपमा गोप्य हुँदैन र प्रायः औपचारिक प्रक्रिया मात्र मानिन्छ ।