वीरगञ्ज । भूमि प्रशासन कार्यालय पर्सामा नक्कली रसिद प्रयोग गरी राजश्व छली गरेको आरोपमा एक लेखापढी व्यवसायी पक्राउ परेका छन् । पक्राउ पर्नेमा वीरगञ्जस्थित शुभ लाभ लेखापढीका सञ्चालक ओमप्रकाश यादव रहेका छन् ।

कार्यालयका प्रमुख खेमराज खत्रीका अनुसार बुधवार यादवविरुद्ध ४ लाख ७२ हजार रुपैयाँ बराबरको राजश्व छली गरिएको भन्दै कार्यालयमा लिखित उजुरी परेको थियो । उजुरी प्राप्त भएपछि कार्यालयले आन्तरिक रूपमा छानबिन अघि बढाएको थियो ।

छानबिनका क्रममा नक्कली रसिद प्रयोग गरी राजश्व छली गरिएको तथ्य फेला परेको प्रमुख खत्रीको दाबी छ । “प्रारम्भिक अनुसन्धानमा नक्कली रसिदमार्फत राजश्व छली भएको देखिएपछि आवश्यक कानुनी कारबाहीका लागि जिल्ला प्रहरी कार्यालय पर्सामा लिखित उजुरी दिएका हौँ,” उनले भने ।

कार्यालयले दिएको उजुरीका आधारमा जिल्ला प्रहरी कार्यालय पर्साले ओमप्रकाश यादवलाई पक्राउ गरेको जनाएको छ । उनीमाथि किर्ते रसिद काटी सरकारी राजश्व हिनामिना गरेको आरोप लागेको प्रहरीले जनाएको छ ।

प्रहरीले घटनाबारे थप अनुसन्धान भइरहेको र संलग्न अन्य व्यक्ति भए नभएको विषयमा समेत अनुसन्धान अगाडि बढाइएको जानकारी दिएको छ ।

घटनापछि भूमि प्रशासन कार्यालय पर्साले सेवाग्राहीलाई आधिकारिक रसिद तथा भुक्तानी प्रक्रिया मात्र प्रयोग गर्न आग्रह गरेको छ । साथै कार्यालयले राजश्वसम्बन्धी अनियमितता रोक्न निगरानी कडा पारिने जनाएको छ ।