बलिउड अभिनेता रणवीर सिंह र फिल्म ‘डन ३’ सम्बन्धी विवाद नयाँ कानुनी मोडमा पुगेको छ।
यस प्रकरणमा अभिनेता रणवीर सिंहले फिल्म उद्योगसँग सम्बन्धित संस्था पश्चिम भारत चलचित्र कर्मचारी महासङ्घ (एफडब्लुआइसीई) विरूद्ध अदालतमा मुद्दा दायर गरेका छन्।
एफडब्लुआइसीईले हालै रणवीर सिंहलाई असहयोग गर्ने सम्बन्धी नोटिस जारी गर्दै उनीमाथि प्रतिबन्ध लगाउने घोषणा गरेको थियो। यो विवाद निर्देशक फरहान अख्तर र निर्माता रितेश सिधवानीको कम्पनी एक्सेल इन्टरटेन्मेन्टसँग चलिरहेको ‘डन ३’ सम्बन्धी मतभेदसँग जोडिएको हो।
एफडब्लुआइसीईका मुख्य सल्लाहकार अशोक पण्डितका अनुसार सङ्घलाई रणवीर सिंहको तर्फबाट कानुनी नोटिस प्राप्त भएको छ। उनले यस विषयमा थप छलफल गर्न मुम्बई सहरमा प्रेस सम्मेलन गर्ने तयारी गरिएको बताएका छन्।
रणवीर सिंहको व्यवहार असहयोगपूर्ण रहेको र पटक–पटक सम्पर्क प्रयास गर्दा पनि उनले छलफल गर्न अस्वीकार गरेको एफडब्लुआइसीईले आरोप लगाएको छ। यही आधारमा सङ्घले उनी विरुद्ध औपचारिक नोटिस जारी गरेको बताइएको छ।
रणवीर सिंहले यस विषयमा सार्वजनिक रूपमा विस्तृत प्रतिक्रिया दिएका छैनन् । उनले जारी गरेको बयानमा फिल्म उद्योग र ‘डन’ फ्रेन्चाइजसँग सम्बन्धित सबै पक्षप्रति सम्मान रहेको बताएका छन्।
उनका अनुसार ‘डन ३’ सम्बन्धी विवादहरूलाई व्यावसायिक र निजी स्तरमै आपसी सम्मानका साथ समाधान गर्नु उचित हुन्छ।
एजेन्सी
