अमेरिकी राष्ट्रपति डोनाल्ड ट्रम्पले अमेरिकी निर्वाचनमा चीनको हस्तक्षेपबारे नयाँ अनुसन्धान गर्न निर्देशन दिएका छन्। यससँगै सम्बन्धित गोप्य गुप्तचर दस्ताबेज सार्वजनिक गर्ने उनले घोषणा पनि गरेका छन्। ट्रम्पले यसबाट अमेरिकी निर्वाचन प्रणालीका गम्भीर कमजोरीहरू उजागर हुने दाबी गरेका छन्।
बिहीबार ह्वाइट हाउसमा ट्रम्पले चीनले अमेरिकी इतिहासकै निर्वाचन डाटामा सबैभन्दा ठूलो हस्तक्षेप गरेको आरोप लगाए। उनले चीनले सन् २०२० को निर्वाचन प्रक्रियादेखि २२ करोड अमेरिकी मतदातासम्बन्धी अभिलेखमा पहुँच हासिल गरेको आरोप लगाए।
ट्रम्पले राष्ट्रिय गुप्तचर निर्देशक र संघीय अनुसन्धान ब्युरोलाई यी आरोपबारे अनुसन्धान गर्न तथा डाटा चुहावटको वास्तविक अवस्था पत्ता लगाउन निर्देशन दिएको बताए।
ट्रम्पले यो घटनाले अमेरिकी निर्वाचन प्रणाली हेरफेर र भ्रष्टाचारको जोखिममा रहेको देखाएको दाबी गरे। उनले संघीय निकायहरूले प्रभावित हुन सक्ने राज्यहरूलाई जानकारी गराउने प्रक्रिया अघि बढाइरहेको बताए।
उनले निर्वाचन सुरक्षालाई थप कडा बनाउन ‘सेभ अमेरिका एक्ट’ पारित गर्न अमेरिकी कंग्रेसलाई पुनः आग्रह गरे। उक्त कानुन लागु भएमा देशभर मतदाता परिचयपत्र अनिवार्य हुने व्यवस्था गरिने प्रस्ताव गरिएको छ।
सम्बोधनका क्रममा ट्रम्पले आफ्नो भाषण प्रत्यक्ष प्रसारण नगर्ने टेलिभिजन नेटवर्कहरूको आलोचना गरे। उनले त्यस्ता सञ्चारमाध्यमको प्रसारण इजाजतपत्र नै खारेज गरिनुपर्ने टिप्पणी गरे।
अमेरिकी समाचार संस्थाहरू एबीसी र एनबीसीले ट्रम्पको सम्बोधन आफ्ना मुख्य टेलिभिजन च्यानलमा प्रत्यक्ष प्रसारण नगरी केवल स्ट्रिमिङ प्लेटफर्ममार्फत उपलब्ध गराएका थिए। सीएनएनले भने उक्त सम्बोधन प्रसारण गरेको जनाएको छ।
यसैबीच, ह्वाइट हाउसले निर्वाचनमा हस्तक्षेपका दाबीसँग सम्बन्धित दस्ताबेजहरू आफ्नो आधिकारिक वेबसाइटमा सार्वजनिक गरेको जनाएको छ। यी आरोपहरूले अमेरिकामा निर्वाचन सुरक्षा तथा वैदेशिक हस्तक्षेपसम्बन्धी बहसलाई थप तीव्र बनाउनेछ।
एजेन्सी
