मुम्बई । ग्लोबल आइकन प्रियंका चोपडा र अमेरिकी पप स्टार निक जोनासको प्रेमकथा कुनै फिल्मी स्क्रिप्टभन्दा कम छैन। 

हालै ‘जोनास ब्रदर्स’ को पोडकास्टमा यस स्टार जोडीले आफ्नो प्रेम जीवनसँग जोडिएका कैयौँ चाखलाग्दा खुलासा गरेका छन्। यस क्रममा निक जोनासले १० वर्षअघि प्रियंका चोपडासँग प्रेमको सुरुवात गराउने पहिलो डाइरेक्ट म्यासेज (डीएम) को समेत चर्चा गरे।

पोडकास्टका क्रममा निकले प्रियंकासँग भएको पहिलो कुराकानीको स्क्रिनसट सेयर गर्दै कसरी डेटिङको सुरुवात भयो भन्नेबारे बताए। निकका अनुसार उनका भाइ केभिन जोनासले पहिलो पटक प्रियंकाको शो ‘क्वान्टिको’ बारे जानकारी दिएका थिए। निकले बिलबोर्डमा सो शोको पोस्टर देखेपछि घर पुगेर तुरुन्तै प्रियंकालाई म्यासेज पठाएका थिए।

‘मैले सनसेट बुलेवार्डमा माथि हेरेँ र त्यहाँ प्रियंकाको अनुहार भएको एउटा ठूलो बिलबोर्ड थियो,’ निकले भने, ‘त्यसको लगत्तै मैले प्रियंकाले मलाई एक्स (ट्विटर) मा फलो गर्छिन् कि गर्दिनन् भनेर हेरेँ र भाग्यवश उनी मलाई पहिलेदेखि नै फलो गरिरहेकी रहिछन्।’ त्यसपछि आफूले ढिला नगरी प्रियंकालाई पहिलो म्यासेज पठाएको उनले बताए।

पोडकास्टमा देखाइएको स्क्रिनसट अनुसार निकले आफ्नो पहिलो म्यासेजमा लेखेका थिए, ‘हेलो, मैले केही मानिसहरूबाट सुनेको छु कि हामी भेट्नुपर्छ। म पनि उनीहरूको कुरामा पूर्ण सहमत छु। के तिमी चाँडै कहिल्यै लस एन्जलस आउँदैछौ?’

यसको जवाफमा प्रियंकाले लेखेकी थिइन्, ‘हे, ग्राहमले मलाई तिम्रो बारेमा धेरै कुरा बताएका छन्। फोनमा टेक्स्ट गरौँ, त्यो बढी प्राइभेट हुनेछ किनभने मेरो यो सोसल मिडिया अकाउन्ट मेरो टिमले पनि चलाउँछ।’

 पोडकास्टमा जब जो र केभिनले यो च्याट पढेर सुनाए, तब प्रियंका र निक आफ्नो हाँसो रोक्न सकिरहेका थिएनन् र एक-अर्काको हात समातेर लजाइरहेका देखिन्थे।

यो सामाजिक सञ्जालको कुराकानीपछि उनीहरूबिच निकटता बढ्दै गयो। सन् २०१७ मा प्रियंका र निक पहिलो पटक ‘भ्यानिटी फेयर अस्कर्स आफ्टर-पार्टी’ मा प्रत्यक्ष भेटेका थिए। त्यसपछि उनीहरू मेट गाला २०१७ मा सँगै देखिएपछि उनीहरूको सम्बन्धको चर्चाले बजार पायो।

सन् २०१८ मा निक जोनासले प्रियंका चोपडालाई विवाहको प्रस्ताव राखेका थिए। त्यसपछि डिसेम्बर २०१८ मा उनीहरूले भारतको उदयपुरमा हिन्दु र क्रिस्चियन रीतिरिवाज अनुसार भव्य रूपमा विवाह गरे। विवाहको चार वर्षपछि अर्थात् सन् २०२२ मा यस जोडीले सरोगेसीमार्फत आफ्नी छोरी मालती म्यारी चोपडा जोनासलाई स्वागत गरे।

कामको कुरा गर्दा, प्रियंका चोपडा चाँडै नै चलचित्र ‘वाराणसी’ मार्फत करिब आठ वर्षपछि भारतीय सिनेमामा पुनरागमन गर्दैछिन्। यस चलचित्रमा साउथ सुपरस्टार महेश बाबु र पृथ्वीराज सुकुमारन पनि मुख्य भूमिकामा छन्। एसएस राजामौलीले निर्देशन गरिरहेको यो चलचित्र हाल निर्माणको चरणमा छ र यो अप्रिल २०२७ मा सिनेमाघरहरूमा प्रदर्शन हुन सक्छ।