रक्सौल । शुक्रबारको मन्त्रिपरिषद् बैठकपछि रक्सौल एयरपोर्टको विकासका लागि भूमि अधिग्रहणको रकम स्वीकृत भएको खबर सार्वजनिक भएसँगै रक्सौलदेखि वीरगञ्जसम्मका स्थानीयवासी र व्यापारी खुसी भएका छन्। वर्षौंदेखि स्थानीयवासीले अघि सारेको एयरपोर्ट निर्माणको माग पूरा हुने दिशामा अघि बढेकोमा उनीहरूले उत्साह व्यक्त गरेका छन्।
वीरगञ्ज उद्योग वाणिज्य संघका अध्यक्ष अनिल कुमार अग्रवालले रक्सौलमा बन्ने एयरपोर्टमा संघको विशेष पहल रहेको बताए। उनले एयरपोर्ट निर्माणका लागि रक्सौलका सांसदहरूको पनि महत्त्वपूर्ण भूमिका रहेको उल्लेख गर्दै यसले नेपाल र भारत दुबै देशलाई आर्थिक, सामाजिक, र सांस्कृतिक फाइदा पुर्याउने विश्वास व्यक्त गरे।
रक्सौल चेम्बर अफ कमर्सका अध्यक्ष अरुण कुमार गुप्ता र महासचिव आलोक कुमार श्रीवास्तवले राज्य सरकारले गरेको निर्णयलाई ऐतिहासिक भनेका छन्। उनीहरूका अनुसार १० जनवरीको दिन रक्सौलका बासिन्दाहरूका लागि स्मरणीय दिनका रूपमा रहन्छ।
यस्तै, नगर सभापति धुरपति देवी, उपसभापति पुष्पा देवी, वीरगञ्ज उद्योग वाणिज्य संघका अध्यक्ष अनिल कुमार अग्रवाल, नेपाल–भारत सहयोग मञ्चका अध्यक्ष अशोक वैद्य, वीरगञ्ज महानगरपालिकाका मेयर राजेशमान सिंह, महागढीमाई नगरपालिकाका मेयर उपेन्द्र यादव, लायन्स क्लब रक्सौलका अध्यक्ष साइमन रेक्स, समाजसेवी महेश अग्रवाल, र कलवार कल्याण समितिका अध्यक्ष राजेश कुमार प्रसादलगायत नागरिक समाजका प्रतिनिधिहरूले यस निर्णयको स्वागत गरेका छन्।
स्थानीयवासीहरूले केन्द्र सरकारसँग रक्सौल एयरपोर्ट निर्माण र सञ्चालनको प्रक्रिया छिटो अघि बढाउन माग गरेका छन्। एयरपोर्ट निर्माणले सीमा क्षेत्रको समग्र विकासमा महत्त्वपूर्ण योगदान दिने विश्वास गरिएको छ।
आर.के. सर्राफ
