आज इस्लाम धर्मावलम्बीहरूको महान् पर्व रमजान महिनाको अन्तिम शुक्रवार हो । स्थानीय भाषामा यसलाई, अलबिदा जुम्मा भनिन्छ । अलबिदा जुम्मा इस्लाम धर्मावलम्बीहरूका लागि एक विशेष धार्मिक र आध्यात्मिक महत्त्व बोकेको दिन हो ।
अलबिदा जुम्मको दिनले रमजानको पवित्र यात्राको समापनको सङ्केत गर्नुका साथै आत्म मूल्याङ्कन, कृतज्ञता, र अल्लाहप्रति समर्पणको भावना जागृत गर्छ । रमजान महिनाभरको उपवास, प्रार्थना, र आत्मसंयमको अन्तिम शुक्रवार मुस्लिम समुदायमा गहिरो श्रद्धा र उत्साहका साथ मनाइन्छ ।
इस्लामिक परम्परामा रमजानको अन्तिम दस दिनलाई अत्यन्तै पवित्र मानिन्छ । अन्तिम दस दिनहरूमा पैगम्बर हजरत मोहम्मद (सल्लल्लाहु अलैहि वसल्लम) ले विशेष रूपमा इबादतमा समय बिताउनुभएको विश्वास छ । अलबिदा जुम्मा पनि यही पवित्रताको एक हिस्सा हो । यस दिनमा गरिने प्रार्थनाहरू विशेष रूपमा स्वीकार हुने विश्वास गरिन्छ । अलबिदा जुम्मको दिन मस्जिदहरूमा जुम्माको नमाज अदा गर्नेदेखि पवित्र कुरानको तिलावत र दुआ माग्ने कार्यमा संलग्न हुने अवसर बन्छ । साथै, गरिब र असहायलाई जकात (दान) प्रदान गरी बरकतको आशा गरिन्छ ।
अलबिदा जुम्माको महत्त्व केवल धार्मिक अनुष्ठानमा मात्र सीमित छैन । अलबिदा जुम्माको दिनले हामीलाई आफ्नो जीवनको समीक्षा गर्ने र सकारात्मक परिवर्तनको सङ्कल्प लिने प्रेरणा पनि दिन्छ । रमजानको उपवासले सिकाएको धैर्य, सहनशीलता, र अनुशासनलाई जीवनमा अङ्गीकार गर्न अन्तिम जम्माको दिनले हामीलाई उत्प्रेरित गर्छ । साथै, अन्तिम जुम्मको दिनले रमजानको बिदाइसँगै इद-उल-फित्रको आगमनको तयारीको सङ्केत पनि गर्छ । रमजानको समापनको यो क्षण मुस्लिम समुदायमा मिश्रित भावनाहरू—पवित्र महिनाको बिदाइको पीडा र इदको खुसी—ले भरिएको हुन्छ ।
सामाजिक दृष्टिकोणबाट हेर्दा, अलबिदा जुम्माले दया, करुणा, र एकताको सन्देश बोकेको छ । अलबिदा जुम्मको दिनले हामीलाई व्यक्तिगत स्वार्थभन्दा माथि उठेर समाजमा सहयोग र भाइचाराको भावना फैलाउन प्रेरित गर्छ । अलबिदा जुम्मा केवल रमजानको बिदाइ गर्ने दिन मात्र होइन, बरु आफूलाई शुद्ध गर्ने, जीवनलाई सही दिशामा अघि बढाउने, र अल्लाहको कृपाको आकाङ्क्षा गर्ने अवसर हो ।
अलबिदा जुम्माले हामीलाई यो पनि स्मरण गराउँछ कि आध्यात्मिकता र मानवता एक अर्काका परिपूरक हुन् । रमजानको यो अन्तिम शुक्रवार केवल एक धार्मिक परम्परा मात्र नभई जीवनको गहिरो सत्य र उद्देश्यप्रति सचेत हुने अवसर हो । हामी सबैले यो दिनबाट प्रेरणा लिई आफ्नो जीवनमा सकारात्मकता र शान्तिको मार्ग अपनाउनुपर्छ ।
मिरोज अहमद
