मुम्बई। धुरन्धर फिल्मका कारण चर्चामा रहेका अभिनेता अर्जुन रामपालले प्रेमिका गेब्रिएला डेमेड्रिएससँग गोप्य रूपमा इन्गेजमेन्ट गरेको खुलासा गरेका छन्। अभिनेताले स्वयं यो कुराको खुलासा गरेका हुन्। साथै, उनकी प्रेमिका गेब्रिएलाले उनीहरू चाँडै विवाह गर्न सक्ने बताएकी छन्।
हालै अर्जुन रामपाल प्रेमिका गेब्रिएलासँग रिया चक्रवर्तीको पोडकास्टमा पुगेका थिए। यस क्रममा दुवैले आफ्नो सम्बन्धबारे कुरा गरे। कुराकानीका क्रममा गेब्रिएलाले भनिन्, ‘हामी अहिले विवाहित छैनौँ, तर हामी चाँडै विवाह गर्न सक्छौँ।’
त्यसै क्रममा अर्जुन रामपालले भने, ‘हाम्रो इन्गेजमेन्ट भइसकेको छ।’ यो सुनेर रिया चक्रवर्ती चकित भइन् र सोधिन्, ‘तपाईँहरूको इन्गेजमेन्ट भइसकेको छ?’ जवाफमा अर्जुन रामपालले भने, ‘हो, हामीले यो कुरा पहिलोपटक तपाईँको शोमा बताइरहेका छौँ।’
यो पोडकास्टको प्रोमो जारी गर्दै रिया चक्रवर्तीले जोडीलाई बधाई पनि दिएकी छन्। उनले लेखेकी छन्, ‘सहरका सबैभन्दा कूल जोडीलाई बधाई होस्।’
अर्जुन रामपालले सन् १९९८ मा मोडल मेहर जेसियासँग विवाह गरेका थिए। यस विवाहबाट उनीहरूका माहिका र मायरा नामका दुई छोरी छन्। विवाहको २० वर्षपछि अर्जुन रामपाल र मेहरले सम्बन्धविच्छेद गरेका थिए। छोरीहरूको कस्टडी मेहरसँग छ।
मेहरसँग सम्बन्धविच्छेद भएपछि सन् २०१९ मा उनले मोडल गेब्रिएलासँगको सम्बन्ध पुष्टि गर्दै उनी गर्भवती भएको घोषणा गरेका थिए। गेब्रिएलाले सन् २०१९ को जुलाईमा छोरा एरिकलाई जन्म दिइन्। यसको चार वर्षपछि २०२३ मा गेब्रिएलाले दोस्रो छोरा एरिवलाई जन्म दिएकी छन्। अब ६ वर्षको सम्बन्धपछि यो जोडीले चाँडै विवाह गर्ने तयारी गरेको छ।
अर्जुन रामपालले डिसेम्बर ५ मा रिलिज भएको फिल्म 'धुरन्धर' मा मेजर इकबालको नकारात्मक भूमिका निभाएका छन्। उनको अभिनय र फिल्म दुवैलाई दर्शकले रुचाइरहेका छन्। फिल्मले ९ दिनमै ३०० करोडभन्दा बढीको कमाई गरिसकेको छ।
एजेन्सी
