मुम्बई । बक्स अफिसमा विश्वव्यापी तहल्का मच्चाएको फिल्म ‘कल्की २८९८ एडी’ को सिक्वेललाई लिएर बलिउड र टलिउडमा नयाँ बहस सुरु भएको छ। फिल्मको पहिलो भागमा सुमति (सम–८०) को मुख्य भूमिका निभाएकी बलिउड अभिनेत्री दीपिका पादुकोण अब सिक्वेलमा नदेखिने चर्चा चलेको छ। 

हिन्दुस्तान टाइम्सको रिपोर्ट अनुसार दीपिकाको स्थानमा दक्षिण भारतीय फिल्म क्षेत्रकी चर्चित अभिनेत्री साई पल्लवीलाई सो भूमिकाका लागि प्रस्ताव गर्ने तयारी भइरहेको छ। फिल्मको पहिलो भागको अन्त्यमा सुमतिको पात्रलाई निकै महत्त्वपूर्ण मोडमा छोडिएको थियो, जसले गर्दा दोस्रो भागमा यो भूमिका अझै शक्तिशाली हुने निश्चित छ। 

दीपिकाले सिक्वेल छोड्नुको कारणबारे आधिकारिक जानकारी नआए पनि केही मिडिया रिपोर्टहरूले भूमिकाको आयतन वा रचनात्मक मतभेदलाई कारण देखाएका छन्। निर्माण पक्षका प्रतिनिधिले साई पल्लवी टोलीको रोजाइमा रहेको सङ्केत गरे पनि उनले फिल्म साइन गरिसकेको बारे आधिकारिक पुष्टि हुन बाँकी छ।

साई पल्लवीको अभिनय क्षमता र बलियो स्क्रिन प्रेजेन्सका कारण उनलाई सुमतिको भूमिकाका लागि ‘उपयुक्त रोजाइ’ मानिएको छ। निर्माताहरूले अहिले केही पनि फाइनल नभएको र छिट्टै आधिकारिक घोषणा गर्ने बताएका छन्।

हाल ‘कल्की २८९८ एडी’ को दोस्रो भागको तयारी अन्तिम चरणमा पुगेको छ। प्रभास, अमिताभ बच्चन र कमल हसन जस्ता दिग्गज कलाकारहरू रहने यस फिल्ममा दीपिकाको बहिर्गमन र साई पल्लवीको प्रवेशको खबरले सिने जगतमा नयाँ तरंग ल्याएको छ।