वीरगञ्ज । पर्सा क्षेत्र नम्बर २ मा नेपाली काँग्रेसबाट उम्मेदवार बनेर चुनाव लडेर पराजित भएका अजयकुमार चौरसियाले पनि यसपालिको निर्वाचनमा आफूले गरेको खर्चको विवरण निर्वाचन कार्यालयमा बुझाएका छन् ।

आफ्ना निर्वाचन प्रतिनिधि रञ्जित कुमार पटेलमार्फत पूर्व मन्त्रीसमेत रहेका चौरसियाले आफूले निर्वाचनमा गरेको खर्चको विवरण चैत २ गते निर्वाचन कार्यालय पर्सामा बुझाएका हुन् ।

जसमा चौरसियाले फागुन २१ को निर्वाचनका लागि आफूले कूल ११ लाख ४१ हजार ४८७ रुपैयाँ मात्रै खर्च भएको उल्लेख गरेका छन् ।

चौरसियाले चुनावमा सबैभन्दा बढी सवारी साधन तथा इन्धन खर्चमा ३ लाख ८५ हजार रुपैयाँ खर्च भएको जनाएका छन् । यस्तै वडा स्तरीय प्रचार प्रसार र खाना नास्तामा २ लाख ५२ हजार रुपैयाँ, निर्वाचन कार्यालय सञ्चालन तथा विविध खर्चमा १ लाख ५२ हजार रुपैयाँ र प्रचार–प्रसार (ब्यानर र ;प्याम्प्लेट) मा १ लाख १० हजार ७४० रुपैयाँ खर्च भएको चौरसियाले उल्लेख गरेका छन् ।

यसै गरी गोष्ठी र भेलामा ७८ हजार रुपैयाँ,डिजिटल मिडियामा ५० हजार ८५० रुपैयाँ, झन्डामा ४५ हजार २०० रुपैयाँ, ब्यानरमा ४१ हजार ६९७ रुपैयाँ, मतदाता नामावलीमा १६ हजार रुपैयाँ र मनोनयन दर्तामा १० हजार रुपैयाँ खर्च भएको चौरसियाले जनाएका छन् ।

पर्सा क्षेत्र नम्बर २ मा पनि रास्वपाका सुशील कुमार कानु ३० हजार ७४० मतका साथ सांसदमा निर्वाचित हुँदा उनका निकटतम प्रतिस्पर्धी काँग्रेस उम्मेदवार तथा पूर्व मन्त्री चौरसिया ११ हजार ८९० मतका साथ दोस्रो भएका थिए। उक्त क्षेत्रमा एमाले उम्मेदवार रिमाकुमारी यादवले भने ११ हजार ६०५ मत मात्रै पाएकी थिइन् ।