नयाँ दिल्ली । बलिउड निर्देशक सञ्जय लीला भन्सालीको आगामी फिल्म ‘लभ एन्ड वार’को सेटमा भयानक दुर्घटना भएको छ । मुम्बईको गोरेगाउँस्थित रोयल पम्प स्टुडियोमा भएको घटनामा ४२ वर्षीय एक कामदारको ज्यान गएको छ ।
दुर्घटना १७ जुन २०२६ को बिहान मुम्बईको गोरेगाउँस्थित रोयल पम्प स्टुडियोमा भएको बताइएको छ । मृतक पीडित ४२ वर्षीय चन्द्रधारीसिंह यादव थिए, जो पेसाले सिकर्मी थिए । उनी फिल्म स्टुडियो सेट्स एन्ड अलाइड मजदुर युनियन (एफएसएसएएमयू) का सदस्य थिए ।
फिल्मको सेट निर्माणको काम भइरहेको बेला सर्ट सर्किट भएर चन्द्रधारीलाई बिजुलीका गम्भीर झट्का लाग्यो । यस क्रममा उनको शरीर गम्भीर रूपमा जल्यो । अस्पतालमा डाक्टरहरूले उनलाई मृत घोषित गरे ।
भन्साली प्रोडक्सनले शोक सन्तप्त परिवारलाई ४० लाख भारुको आर्थिक सहयोगको घोषणा गरेको छ । एनडीटीभीको रिपोर्ट अनुसार, एफएसएसएएमयूका अध्यक्ष बी.एन.तिवारीले मृतकका छोराछोरी निकै सानो भएकोले क्षतिपूर्ति रकम ५० लाख रुपैयाँ पुर्याउन माग गरेका छन् ।
यसबाहेक, महासङ्घले निर्देशक सञ्जय लीला भन्सालीलाई चन्द्रधारीका दुई छोराछोरीको सम्पूर्ण शिक्षा खर्च बेहोर्न र उनकी श्रीमतीलाई निर्माण गृहमा जागिर उपलब्ध गराउन अनुरोध गरेको छ ।
याे दुर्घटनाले फेरि एकपटक फिल्म सेटहरूमा दैनिक ज्यालादारीमा काम गर्ने मजदुरहरूको सुरक्षामाथि गम्भीर प्रश्न उठाएको छ । असुरक्षित काम गर्ने वातावरणका कारण यस्ता घटना बेला बेलामा सुन्नमा आइरहेका छन् । महासङ्घले अब सबै निर्माण गृहहरूलाई सेटहरूमा कडा सुरक्षा व्यवस्था गर्न र काम गर्ने समय नियमित गर्न कडा अपिल गरेको छ ।
एजेन्सी
