बारा। नेपाली कांग्रेस बाराको जिल्ला पार्टी कार्यालयमा मंगलबार दुई पक्षका कार्यकर्ताबीच विवाद चर्किँदा झडप भएको छ। घटनापछि स्थिति नियन्त्रणमा लिन ठूलो संख्यामा सुरक्षाकर्मी परिचालन गरिएको छ।

प्रत्यक्षदर्शीका अनुसार पार्टीभित्रको संस्थापक समूहलाई जिल्ला पार्टी कार्यालय प्रवेश गर्न रोकिएपछि विवाद सुरु भएको थियो। सामान्य भनाभनबाट सुरु भएको विवाद केहीबेरमै उग्र बन्दै दुवै पक्षबीच ढुंगामुढासमेत भएको बताइएको छ।

झडपपछि पार्टी कार्यालय आसपासको क्षेत्रमा तनावपूर्ण अवस्था सिर्जना भएको छ। थप अप्रिय घटना हुन नदिन नेपाल प्रहरीले घटनास्थलमा सुरक्षा व्यवस्था कडा बनाएको छ भने अवस्था नियन्त्रणमा ल्याउने प्रयास जारी राखेको छ।

यसैबीच, घटनास्थलमा रहेका प्रत्यक्षदर्शीहरूले प्रशासन सुरुदेखि नै प्रभावकारी रूपमा सक्रिय हुन नसकेको आरोप लगाएका छन्। यद्यपि, जिल्ला प्रशासन कार्यालय बारा र जिल्ला प्रहरी कार्यालयले घटनाबारे हालसम्म औपचारिक प्रतिक्रिया सार्वजनिक गरेका छैनन्।

प्रहरीका अनुसार घटनाको कारण, क्षति तथा संलग्न पक्षबारे थप विवरण संकलन भइरहेको छ। घटनासम्बन्धी थप जानकारी आउन बाँकी रहेको प्रहरीले जनाएको छ।