सबै जना स्वस्थ र चम्किलो छाला चाहन्छन् । यो प्राप्त गर्न केही मानिसहरू महँगा सौन्दर्य उत्पादनहरू प्रयोग गर्छन् भने कतिपयले विभिन्न घरेलु उपायहरू अपनाउँछन् ।

त्यस्तै एउटा उपाय नुनपानीले अनुहार धुनु पनि हो । तपाईंले केही 'ब्युटी इन्फ्लुएन्सर'हरूले यसरी अनुहार धोइरहेको पनि देख्नुभएको होला ।

तर के यो सुरक्षित छ ? आजको यस लेखमा हामी नुनपानीले अनुहार धुँदा देखिने असरबारे चर्चा गर्नेछौँ ।

• यो उपाय कत्तिको प्रभावकारी छ?

'हेल्थलाइन'को रिपोर्टअनुसार नुनले अनुहारमा हल्का 'स्क्रब'को रूपमा काम गर्छ । यसले छालाका मृत कोषहरू हटाउन मद्दत गर्छ, जसले छालालाई सफा, नरम र केही उज्यालो देखाउँछ । यसबाहेक नुनले छालाबाट अतिरिक्त तेल, धुलो र फोहोर हटाउन पनि सहयोग गर्छ । यसले रोमछिद्रहरू सफा गर्न र तैलीय छाला भएकाहरूलाई केही राहत प्रदान गर्न सक्छ ।

नुनपानीले अनुहारको छालामा फाइदा पुर्‍याउने भए तापनि यसलाई दैनिक वा अत्यधिक प्रयोग गर्नु उचित हुँदैन । अत्यधिक प्रयोगले छालालाई हानि पुर्‍याउन सक्छ । यसका केही सम्भावित हानिहरू यस प्रकार छन्:

• नुनले छालाको ओसिलोपन कम गर्छ, जसले गर्दा सुख्खापन निम्त्याउन सक्छ ।
• केही मानिसलाई नुनपानीले छालामा जलन हुने, चिलाउने, रातो हुने वा छाला फुट्ने समस्या हुन सक्छ ।
• पहिले नै सुख्खा, संवेदनशील छाला वा एक्जिमा भएका व्यक्तिहरूले नुनपानीको प्रयोगबाट जोगिनुपर्छ ।

त्यसोभए के गर्ने?

• यदि तपाईं आफ्नो अनुहार नुनपानीले धुन चाहनुहुन्छ भने यसलाई दैनिक प्रयोग नगर्नुहोस् ।
• उत्तम परिणामका लागि तपाईंले हप्तामा १ देखि २ पटक मात्र नुनपानीले अनुहार धुन सक्नुहुन्छ ।
• धुँदाखेरि अनुहारलाई बेस्सरी रगड्ने गल्ती नगर्नुहोस् ।
• छालाको ओसिलोपन कायम राख्न अनुहार धोएपछि मोइस्चराइजर अवश्य लगाउनुहोस् ।
• नुनपानीको प्रयोगपछि अनुहारमा जलन भएमा, चिलाएमा, रातो भएमा वा अत्यधिक सुख्खापन अनुभव भएमा तुरुन्तै यसको प्रयोग बन्द गर्नुहोस् ।
• यदि तपाईंलाई छालासँग सम्बन्धित अरू कुनै चिन्ता छ भने कुनै पनि घरेलु उपचार प्रयास गर्नुअघि छालारोग विशेषज्ञसँग परामर्श गर्नुहोस् ।

(अस्वीकरण: सल्लाहसहितको यो सामग्रीले सामान्य जानकारी मात्र प्रदान गर्दछ । थप जानकारीका लागि सधैँ विशेषज्ञ वा आफ्नो चिकित्सकसँग परामर्श गर्नुहोस् ।)