सिराहा । सिराहा चोहर्वा सडक खण्डको भलुवाही चौकमा बुधबार साँझ भएको सवारी दुर्घटनामा १८ वर्षीय युवकको ज्यान गएपछि स्थानीयले बिहीबार बिहानैदेखि राजमार्ग अवरुद्ध गरेका छन्।
सिराहा नगरपालिका–११, भलुवाहीका नीरज कामतलाई स१ ह ७२४ नम्बरको अटोले ठक्कर दिएको थियो, जसका कारण उनको घटनास्थलमै मृत्यु भएको थियो। दुर्घटनापछि आक्रोशित स्थानीयले दोषी चालक र सवारी धनीमाथि कारबाहीको माग गर्दै प्रदर्शन सुरु गरेका हुन्।
प्रदर्शनकारीहरूले टायर बालेर सिराहा चोहर्वा सडक खण्ड पूर्ण रूपमा अवरुद्ध गरेका छन्। सिराहाको सदरमुकाम सिराहा बजार जाने तथा आउने सवारी साधन ठप्प छन्। यात्रुहरू समस्यामा परेका छन् भने स्थानीय व्यवसाय र जनजीवन पनि प्रभावित भएको छ।
मृतकका परिवार र स्थानीयले उचित क्षतिपूर्ति र दुर्घटनामा संलग्नलाई कडा कारबाहीको माग गरेका छन्। प्रदर्शनकारीहरूका माग सम्बोधन गर्न नसक्दा राजमार्गको अवरोध हट्न सकेको छैन।
जिल्ला प्रहरी कार्यालय, सिराहाका सूचना अधिकारी वीरेन्द्र पासवानका अनुसार दुर्घटनामा संलग्न चालक र अटो प्रहरीले नियन्त्रणमा लिएको छ। घटनाको थप अनुसन्धान भइरहेको र प्रशासनले समस्या समाधानका लागि वार्ताको प्रयास गरिरहेको जानकारी उनले दिए।
दुर्घटनापछि भएको प्रदर्शनले यात्रुहरू लामो समयसम्म अलपत्र परेका छन्। व्यवसायी र अन्य स्थानीयका दैनन्दिन क्रियाकलाप प्रभावित भएका छन्। प्रदर्शनको प्रभाव चाँडो समाधान गर्नुपर्ने स्थानीयको भनाइ छ।
प्रशासन र प्रदर्शनकारीबीच सहमति हुने अपेक्षाका साथ स्थानीयले समाधानको प्रतीक्षा गरिरहेका छन्।
राधेश्याम कुशवाहा
