रौतहट। रौतहटको राजदेवी नगरपालिका – ५ स्थित दलित बस्तीमा आइतबार मध्य राति भएको आगलागीबाट २५ घर जलेर पूर्ण रूपमा नष्ट भएका छन् ।
स्थानीय बाबुलाल हजराको घरमा विद्युत् सर्ट सर्किट भएर आगो सल्किएपछि दीपेन्द्र पासवान, प्रदीप पासवान, रामनाथ हजरा लगायतका परिवारका घरहरूमा आगो फैलिएको हो ।
घटना भएको जानकारी पाएपछि प्रहरी चौकी ब्रह्मपुरी, सशस्त्र प्रहरी बलको बीओपी बेलविछवा र गौर नगरपालिकाको वारुणयन्त्रको सहायताले आगो नियन्त्रणमा लिइएको थियो ।
रौतहट प्रहरीले दिएको जानकारी अनुसार आगलागीबाट लाखौँको आर्थिक क्षति भएको अनुमान गरिएको छ । आगलागीको कारण घरधनीहरू विचलित छन् भने राहत तथा पुनः स्थापनाका लागि स्थानीय प्रशासनसँग सहकार्य भइरहेको छ ।
यस घटनाले विद्युत् सुरक्षा सम्बन्धी सचेतना अभिवृद्धिको आवश्यकता औँल्याएको छ । पीडितहरूलाई तत्काल राहत उपलब्ध गराउन तथा पुनः स्थापनाका उपायहरूको व्यवस्था गर्न स्थानीय तहले पहल गरिरहेको छ ।
सञ्जय सहनी
