बारा। आम जनता पार्टी (आजपा)का अध्यक्ष तथा पूर्वमन्त्री प्रभु साहले ऐतिहासिक, धार्मिक र पर्यटकीय दृष्टिकोणले महत्वपूर्ण गढीमाई मन्दिरलाई विश्व सम्पदा सूचीमा सूचीकृत गर्न सरकारसँग माग गरेका छन्। शनिबार बाराको महागढीमाई नगरपालिका, बरियारपुरस्थित गढीमाई मन्दिरमा आजपा जिल्ला कमिटीले आयोजना गरेको सर्वपक्षीय भेलालाई सम्बोधन गर्दै अध्यक्ष साहले गढीमाईलाई विश्व सम्पदा सूचीमा समावेश गराउन सबैले आ-आफ्नो तर्फबाट पहल गर्नुपर्ने बताए।
उनले केन्द्र र प्रदेश सरकारले गढीमाई मन्दिरको विकास र मेलाको प्रवर्द्धनमा खासै ध्यान नदिएको भन्दै आलोचना गरे। साथै, प्रधानमन्त्री केपी शर्मा ओलीको नेतृत्वको सरकारले मधेसको विकासमा चासो नदिएको आरोप पनि लगाए। "गढीमाई मन्दिर मधेसमा भएकै कारण सरकारको ध्यान नपुगेको हो," साहले भने।
पूर्व शहरी विकास मन्त्रीसमेत रहेका साहले आफू मन्त्री हुँदा महागढीमाईलाई स्मार्ट सिटीको रुपमा विकास गर्ने योजनासहित विभिन्न परियोजनाहरु प्रस्ताव गरेको स्मरण गरे। पाँच वर्षमा एक पटक आयोजना हुने गढीमाई मेला यस वर्ष मंसिर १ गतेबाट सुरु हुँदैछ, जसले पशु बलिका लागि विश्वभर ख्याति प्राप्त गरेको छ।
कार्यक्रममा आजपाका वरिष्ठ उपाध्यक्ष उपेन्द्र साह, उपाध्यक्षहरु अशोक लामा र बिल्टू यादव, महासचिव त्रिभुवन साह, उपमहासचिव चन्द्रभुषण साह, नगरप्रमुख उपेन यादव, र गढीमाई ट्रस्टका अध्यक्ष रामचन्द्र साहको उपस्थिति रहेको थियो।
गढीमाई मन्दिरको महत्त्व र विश्व सम्पदामा सूचीकृत गराउनका लागि पहल गर्नुपर्ने आवश्यकता
अध्यक्ष साहले गढीमाई मन्दिरलाई विश्व सम्पदा सूचीमा सूचीकृत गराउन सबै पक्षले जिम्मेवारीपूर्वक अघि बढ्नुपर्ने आवश्यकता औंल्याए।
आर.के. सर्राफ
