वीरगञ्ज। माईस्थान मन्दिर अगाडिको पार्कमा माईस्थान ईहि समितिको आयोजनामा सामूहिक ईहि बेल विवाह कार्यक्रम सम्पन्न भएको छ। कार्यक्रममा नेवार समुदायका २५ जना छोरीहरूको बेल विवाह गरिएको हो।

समारोह माईस्थान ईहि समितिका अध्यक्ष श्याम प्रसाद श्रेष्ठको अध्यक्षतामा सम्पन्न भएको थियो। कार्यक्रममा महासचिव सुनिल जोशी, सचिव सुन्दर श्रेष्ठ, कोषाध्यक्ष आनन्दलाल जोशी तथा समाजसेवी श्रवणबहादुर रायमाझीको विशेष उपस्थिति रहेको थियो।

नेवार परम्परा र संस्कृतिको निरन्तरता
महासचिव सुनिल जोशीका अनुसार माईस्थान ईहि समिति २०४० सालमा स्थापना भएको हो। स्थापना कालदेखि नेवार समुदायका छोरीहरूको बेल विवाह गराउँदै आएको समिति अहिले ४०औँ पटकको सामूहिक विवाह सम्पन्न गरेको छ।

उनका अनुसार नेवार समुदायमा छोरीहरूले महिनावारी सुरु हुनु अघि बेललाई भगवान विष्णुको प्रतीक मान्दै विवाह गरिन्छ। यो परम्परालाई संस्कारको रूपमा मानिएको छ। विवाहपश्चात् छोरीहरूलाई संस्कारको दायित्व पूरा गराइएको जोशीले बताए।

समाजसेवाको उदाहरण
समाजसेवी श्रवणबहादुर रायमाझीले नेवार समुदायका छरिएर रहेका व्यक्तिहरूलाई एकत्रित गर्दै संस्कारको प्रवर्द्धन गर्ने उद्देश्यले यस्तो कार्यक्रम आयोजना गरिएको बताए।

सहभागीका लागि सहज व्यवस्था
महासचिव जोशीका अनुसार सामूहिक विवाह कार्यक्रममा सहभागीका लागि ३,५०० रुपैयाँ शुल्क तोकिएको छ भने आर्थिक रूपमा विपन्न, गरिब तथा असहाय परिवारका छोरीहरूलाई निःशुल्क सहभागी गराइएको छ। विवाह सम्पन्न गर्नका लागि विशेष रूपमा काठमाडौंबाट बाजेहरू बोलाएर पूजाको व्यवस्था गरिएको थियो।

यस प्रकारका सामूहिक कार्यक्रमले नेवार समुदायका परम्परा, संस्कार र एकताको प्रवर्द्धन गर्ने विश्वास गरिएको छ।