वीरगञ्ज । वीरगञ्जमा फैलिएको हैजा र झाडापखाला सङ्क्रमण नियन्त्रणोन्मुख भएपछि नेपाली सेनाले बल्ल स्वास्थ्यकर्मीहरूको टोली पठाएको छ । तर, सङ्कटको चरम अवस्थामा मौन बसेको सेनाले रोग नियन्त्रणमा आइसकेपछि प्रचारबाजीका लागि चिकित्सकहरू खटाएको भन्दै स्थानीय स्वास्थ्यकर्मी र बासिन्दाहरूले तीव्र आलोचना गरेका छन् ।
झन्डै दुई साता अगाडि हैजा र झाडापखालाको सङ्क्रमण अनियन्त्रित रूपमा फैलिएको थियो । त्यतिबेला नारायणी अस्पतालका चिकित्सक र स्वास्थ्यकर्मीहरूले दिनरात नभनी जोखिमपूर्ण अवस्थामा बिरामीहरूको उपचार गरेका थिए । तर, सङ्कटको उक्त समयमा नेपाली सेनाको श्रीजंग गणले कुनै सहयोग नगरेको भन्दै आलोचकहरूले प्रश्न उठाएका छन् ।
अहिले सङ्क्रमण नियन्त्रणमा आइसकेपछि मात्र श्रीजंग गणले नारायणी अस्पतालमा चार जना चिकित्सकको टोली खटाएको छ ।
नारायणी अस्पतालका मेडिकल सुपरिन्टेन्डेन्ट डा. चुमनलाल दासका अनुसार, बिहीबारदेखि श्रीजंग गणका गणपति कर्णेल लोकेन्द्र कार्कीको निर्देशनमा सेनाका चिकित्सकहरू अस्पतालमा खटिएका छन् । कर्णेल कार्कीले हैजाले निम्त्याएको स्वास्थ्य सङ्कटलाई मध्यनजर गर्दै तत्काल सहयोगका लागि चिकित्सक टोली पठाइएको दाबी गरेका छन् । उनले स्थानीय सरकार, अस्पताल र सुरक्षाकर्मीहरूको संयुक्त प्रयासले रोग नियन्त्रणमा सफलता हासिल हुने विश्वास व्यक्त गरे । तर, उनको यो भनाइलाई धेरैले ‘सस्तो प्रचारबाजी’ को संज्ञा दिएका छन् ।
नाम नबताउने सर्तमा नारायणी अस्पतालका एक चिकित्सकले सेनाको कदमलाई ढिलासुस्ती र प्रचारबाजीको संज्ञा दिए । उनले भने, “हैजा र झाडापखालाको सङ्क्रमणले अस्पताल भरिभराउ भएको बेला नेपाली सेनाले कुनै वास्ता गरेन । हामीले रातदिन नभनी, आफ्नो ज्यान जोखिममा राखेर सयौँ बिरामीको उपचार गर्यौँ र धेरैलाई ठिक गरेर घर फर्कायौँ । तर, अहिले सङ्क्रमण नियन्त्रणमा आइसकेको अवस्थामा सेनाले चिकित्सकहरू पठाएर सस्तो लोकप्रियताको नाटक गरेको छ । यो ढिलासुस्ती र प्रचारबाजीले सङ्कटको समयमा सेनाको भूमिकामाथि नै प्रश्न उठाएको छ ।”
वीरगञ्ज महानगरपालिकाको स्वास्थ्य शाखाको तथ्याङ्कअनुसार, भदौ ६ गते पहिलो पटक तीन जनामा हैजाको सङ्क्रमण पुष्टि भएको थियो । त्यसपछि सङ्क्रमितको सङ्ख्या तीव्र रूपमा बढ्दै गएर एकै दिनमा ५० जनासम्म थपिएका थिए । यद्यपि, पछिल्लो समय सङ्क्रमितको सङ्ख्या उल्लेखनीय रूपमा घट्दै गएको छ । सङ्क्रमितहरूको सङ्ख्यामा कमी आउनुको मुख्य श्रेय नारायणी अस्पतालका चिकित्सक र स्वास्थ्यकर्मीहरूको अथक प्रयासलाई दिइएको छ ।
नारायणी अस्पतालमा अहिले पनि झाडापखाला र हैजाका बिरामीहरूको उपचार भइरहेको छ । स्वास्थ्यकर्मीहरूले स्थानीय बासिन्दालाई सुरक्षित खानेपानीको प्रयोग गर्न, सरसफाइमा विशेष ध्यान दिन र आवश्यक सावधानी अपनाउन आग्रह गरेका छन् । यद्यपि, सङ्कटको चरम अवस्थामा सहयोग नगरेर अहिले प्रचारबाजीमा उत्रिएको भन्दै नेपाली सेनाको भूमिकामाथि स्थानीय बासिन्दा र स्वास्थ्यकर्मीहरूले असन्तुष्टि व्यक्त गरेका छन् ।
आशुकुमार सर्राफ
