रक्सौल । भारत–नेपाल सीमावर्ती सहर रक्सौलमा आयकर विभाग र प्रवर्तन निर्देशनालय (ईडी) को संयुक्त टोलीद्वारा विगत चार दिनदेखि निरन्तर छापेमारी जारी रहेको छ। गहिरो अनुसन्धानका साथ अघि बढाइएको उक्त कारबाहीलाई अत्यन्त गम्भीर रूपमा हेरिएको छ।
स्रोतका अनुसार छापेमारीको नेतृत्व ईडीकी निर्देशक तहकी एक महिला अधिकारी स्वयंले गरिरहेकी छन्। यसले कारबाहीको संवेदनशीलता र गम्भीरता झनै बढाएको छ। चर्चित व्यवसायी मोहम्मद कलीमसँग सम्बन्धित विभिन्न स्थानहरूमा छापेमारी भइरहेको बताइएको छ।
छापेमारी कलीमका आफन्त तथा निकट व्यक्तिहरूको घरमा मात्र सीमित नरही आश्रम रोडस्थित उनका चार्टर्ड एकाउन्टेन्ट (सीए) को कार्यालय र आवासमा समेत व्यापक रूपमा गरिएको स्रोतले जनाएको छ। प्रारम्भिक सूचनाअनुसार छापेमारीका क्रममा दुई हजार दरका नोटमा ठूलो परिमाणमा नगद, बहुमूल्य गरगहना तथा जग्गा खरिद–बिक्रीसँग सम्बन्धित महत्वपूर्ण कागजातहरू फेला परेका छन्। यद्यपि, बरामद सामग्रीको यकिन विवरणबारे सम्बन्धित निकायले हालसम्म औपचारिक पुष्टि गरेको छैन।
स्थानीयस्तरमा भने मोहम्मद कलीमको विगत र वर्तमान सम्पत्तिलाई लिएर चर्को चर्चा सुरु भएको छ। स्थानीयहरूको भनाइमा करिब २० वर्षअघि दुई–चार वटा मोटरसाइकल बिक्रीबाट व्यवसाय सुरु गरेका कलीम अहिले अर्बपति बनेको देख्दा धेरै मानिस अचम्मित भएका छन्।
छापेमारी स्थल आसपास सुरक्षा व्यवस्था अत्यन्त कडा बनाइएको छ। बीएमपीका जवान, अर्धसैनिक बल तथा एसएसबीका सुरक्षाकर्मीहरू सडकदेखि छापेमारी स्थलभित्रसम्म तैनाथ गरिएको छ, जसका कारण सम्पूर्ण क्षेत्र उच्च सुरक्षा निगरानीमा रहेको छ।
यति ठूलो स्तरको कारबाही भइरहँदा पनि व्यवसायी मोहम्मद कलीमको तर्फबाट हालसम्म कुनै प्रतिक्रिया आएको छैन। स्रोतका अनुसार कलीमको कारोवार भारत बाहेक अन्य विदेशी मुलुकहरूसँग समेत जोडिएको आशङ्का गरिएको छ।
छापेमारी तथा अनुसन्धान प्रक्रिया सम्पन्न भएपछि मात्र यस प्रकरणको पूर्ण विवरण सार्वजनिक हुने र आधिकारिक जानकारी आउने सम्बन्धित निकायले संकेत गरेका छन्।
आर.के. सर्राफ
