वीरगञ्ज । ट्राफिक जनचेतनामूलक सप्ताह कार्यक्रम–२०८३ अन्तर्गत वीरगञ्जमा चालकहरूको निःशुल्क आँखा परीक्षण तथा ट्राफिक सचेतना कार्यक्रम सम्पन्न गरिएको छ। ग्रीनसिटी सामुदायिक प्रहरी सेवा केन्द्र आदर्शनगर र जिल्ला ट्राफिक प्रहरी कार्यालय पर्साको संयुक्त आयोजनामा वीरगञ्ज नयाँ बसपार्कमा कार्यक्रम सञ्चालन गरिएको हो।

कार्यक्रममा सार्वजनिक तथा निजी सवारीसाधनका चालकहरूको निःशुल्क आँखा परीक्षण गरिएको थियो। साथै सुरक्षित सवारी सञ्चालन, ट्राफिक नियमको पालना तथा सडक दुर्घटना न्यूनीकरणसम्बन्धी जनचेतनामूलक जानकारी प्रदान गरिएको आयोजकले जनाएको छ।

जिल्ला ट्राफिक प्रहरी कार्यालय पर्साका प्रमुख प्रहरी निरीक्षक दीपेन्द्र श्रेष्ठले ट्राफिक सप्ताह अन्तर्गत विभिन्न सचेतनामूलक कार्यक्रम सञ्चालन भइरहेको जानकारी दिँदै चालकहरूको स्वास्थ्य अवस्था, विशेषगरी दृष्टि क्षमता सुरक्षित यात्राका लागि अत्यन्त महत्वपूर्ण हुने भएकाले आँखा परीक्षण कार्यक्रम आयोजना गरिएको बताए।

कार्यक्रमका प्रमुख अतिथि मधेश प्रदेश ट्राफिक प्रहरी कार्यालयका प्रमुख प्रहरी उपरीक्षक ज्ञानेन्द्र बहादुर बस्नेतले सडक सुरक्षाका लागि चालक, यात्रु तथा सर्वसाधारण सबैको साझा जिम्मेवारी रहेको उल्लेख गर्दै ट्राफिक नियमको पूर्ण पालना गर्न आग्रह गरे। उनले सचेत र जिम्मेवार चालक नै दुर्घटना न्यूनीकरणको प्रमुख आधार भएको बताए।

कार्यक्रममा ग्रीनसिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतान, जिल्ला प्रहरी कार्यालय पर्साका प्रहरी नायब उपरीक्षक राजु कार्की,वीरगञ्ज महानगरपालिका वडा नम्बर ४ का अध्यक्ष जगत साह कानु लगायत विभिन्न संघसंस्थाका प्रतिनिधि, प्रहरी अधिकारी तथा चालकहरूको उल्लेखनीय उपस्थिति रहेको थियो।

आयोजकका अनुसार कार्यक्रमबाट चालकहरूले आफ्नो दृष्टि अवस्थाबारे जानकारी पाउनुका साथै ट्राफिक नियमप्रति थप सचेत बन्ने अवसर प्राप्त गरेका छन्। ट्राफिक सप्ताह अवधिभर यस्ता जनचेतनामूलक तथा सुरक्षा प्रवर्द्धन गर्ने कार्यक्रमहरूलाई निरन्तरता दिइने जिल्ला ट्राफिक प्रहरी कार्यालय पर्साले जनाएको छ।